शिर्डीच्या आंतरराष्ट्रीय सहकार परिषदेत पतसंस्थांच्या प्रतिनिधींनी बहुसंख्येने सहभागी व्हावे – शशिकांत राजोबा, महासचिव ; कोल्हापुरात सहकार दिंडीचे जल्लोषात स्वागत
कार्यकारी संपादक प्रा.पोपट साळवे
शिर्डीच्या आंतरराष्ट्रीय सहकार परिषदेत पतसंस्थांच्या प्रतिनिधींनी बहुसंख्येने सहभागी व्हावे – शशिकांत राजोबा, महासचिव ; कोल्हापुरात सहकार दिंडीचे जल्लोषात स्वागत
कोल्हापूर : महाराष्ट्र राज्य सहकारी पतसंस्था फेडरेशनचे अध्यक्ष काकासाहेब कोयटे यांच्या नेतृत्वाखाली आंतरराष्ट्रीय सहकार वर्षानिमित्त दोन सहकार दिंड्यांचे तसेच येत्या ८ व ९ फेब्रुवारी रोजी शिर्डी येथे आंतरराष्ट्रीय सहकार परिषदेचे आयोजन केले आहे. सहकार परिषदेत विविध विषयांवर मंथन करून महत्त्वाचे ठराव मंजूर करण्यात येणार असून कोल्हापूर, सांगली, सातारा जिल्ह्यांसह राज्यातील सर्व सहकारी पतसंस्थांच्या संचालक व अधिकाऱ्यांनी बहुसंख्येने परिषदेत सहभागी व्हावे, असे आवाहन राज्य पतसंस्था फेडरेशनचे महासचिव शशिकांत राजोबा यांनी केले.
राज्य सहकारी पतसंस्था फेडरेशनच्या वतीने मुंबईपासून शिर्डीपर्यंत काढण्यात आलेल्या स्व. धनंजयराव गाडगीळ सहकार दिंडीचे शनिवारी (१ फेब्रुवारी) सायंकाळी कराड येथून कोल्हापूर येथे आगमन झाले. कोल्हापूर विभागीय सहनिबंधक (सहकारी संस्था), जिल्हा उपनिबंधक व कोल्हापूर जिल्हा नागरी सहकारी पतसंस्था फेडरेशनच्या वतीने फटाक्यांची आतषबाजी, तुतारी वाजवून झांज व हलगीच्या निनादात “जय सहकार”, “अभिमान सहकाराचा, स्वाभिमान पतसंस्थांचा” अशा विविध घोषणा देत या दिंडीचे जल्लोषात जोरदार स्वागत करण्यात आले.
यानिमित्त कोल्हापूर जिल्हा परिषद कर्मचारी सहकारी सोसायटीच्या सभागृहात आयोजित स्वागत कार्यक्रमात शशिकांत राजोबा बोलत होते. यावेळी कोल्हापूर (दक्षिण) चे आमदार अमल महाडिक यांच्या हस्ते दीप प्रज्वलन करण्यात आले. प्रारंभी राज्य पतसंस्था फेडरेशनचे उपकार्याध्यक्ष चंद्रकांत वंजारी, महासचिव शशिकांत राजोबा, संचालक डॉ. रवींद्र भोसले, निमंत्रित संचालक सागर चौगुले, बुलढाणा अर्बन को-अॉप. क्रेडिट सोसायटीचे मुख्य कार्यकारी अधिकारी शिरीष देशपांडे,कोल्हापूर शहर उपनिबंधक (सहकारी संस्था) प्रियाताई दळणर, कोल्हापूर जिल्हा पतसंस्था फेडरेशनचे अध्यक्ष शंकरराव पाटील, कार्याध्यक्ष अनिल पाटील, सहकार भारतीचे जिल्हाध्यक्ष अरविंद मजलेकर, जिल्हा पतसंस्था फेडरेशनचे संचालक प्रा. सुनील भोसले, नेटवीन सॉफ्टवेअर कंपनीचे मसूद अत्तार व इतरमा न्यवरांच्या हस्ते दिंडीतील रथाचे पूजन करण्यात आले.
आ. अमल महाडिक यांनी देशाच्या विकासात महाराष्ट्रातील सहकारी चळवळीचे भरीव योगदान असून, पश्चिम महाराष्ट्रात सहकार चळवळ तळागाळातील लोकांपर्यंत रुजली असल्याचे सांगितले. “सहकारातून समृद्धी” हे ब्रीद जोपासत सहकारी पतसंस्थांनी ग्रामीण भागातील अर्थव्यवस्था मजबूत करून आर्थिक विषमतेची दरी दूर करण्यासाठी उल्लेखनीय कामगिरी बजावली आहे. राज्य पतसंस्था फेडरेशनचे अध्यक्ष काकासाहेब कोयटे व त्यांच्या सहकाऱ्यांनी सहकारी पतसंस्थांचे अनेक प्रश्न शासन दरबारी मांडून ते मार्गी लावले आहेत. फेडरेशनच्या अडीअडचणी सोडविण्यासाठी सर्वतोपरी सहकार्य करण्याचे आश्वासन त्यांनी दिले.
सहकार चळवळीत सहकारी बँकांबरोबर पतसंस्थांचेही महत्त्वपूर्ण योगदान आहे. शासनाने सहकारी साखर कारखान्यांप्रमाणे पतसंस्थांनाही आर्थिक मदत दिली पाहिजे. राज्य पतसंस्था फेडरेशन व जिल्हा पतसंस्था फेडरेशनला विश्वासात घेऊनच सरकारने अंशदान भरण्याबाबतचा निर्णय घ्यावा, असे सांगून शशिकांत राजोबा म्हणाले, सहकारी पतसंस्था चळवळीची प्रतिष्ठा वाढावी तसेच पतसंस्था चळवळीवर सर्वसामान्य जनतेचा विश्वास वाढावा, पतसंस्था चळवळीत महिला व तरुणांचा सहभाग वाढावा या उद्देशाने शिर्डी येथे दोन दिवसीय आंतरराष्ट्रीय सहकार परिषद आयोजित केली आहे. या परिषदेत भारतातील सहा राज्यांसह आठ देशातील सहकारी पतसंस्था चळवळीतील १५ हजाराहून अधिक प्रतिनिधी उपस्थित राहणार आहेत. या परिषदेत महाराष्ट्र व इतर राज्यातील तसेच परदेशातील सहकार कायदे, सहकारी पतसंस्थांची कार्यपद्धती व इतर विषयांवर चर्चा होणार असून ही परिषद सहकार चळवळीला नवी दिशादर्शक ठरेल, असा विश्वास त्यांनी व्यक्त केला.
या प्रसंगी प्रिया दळणर, शंकरराव पाटील, शिरीष देशपांडे, अनिल पाटील, अरविंद मजलेकर, सागर चौगुले आदींनी आपल्या मनोगतातून सहकारी पतसंस्थांचे महत्त्व अधोरेखित केले. कार्यक्रमास सहाय्यक निबंधक (सहकारी संस्था) प्रेमचंद राठोड (करवीर), संजय परभणे (पन्हाळा), चंद्रकांत इंगवले यांच्यासह कोल्हापूर जिल्हा व परिसरातील विविध पतसंस्थांचे पदाधिकारी, संचालक, अधिकारी व कर्मचारी मोठ्या संख्येने उपस्थित होते.
